Ken puilh e oa ar rannyezhoù euskarek e Bro-Euskadi ken e tleas emsaverien hag arbennigourien ar yezh goveliñ e 1968 ur yezh unvan, an « euskara batua », evit ma c’hellfe an euskareg dont da vezañ ur yezh stad. An euskara batua-mañ, seurt koine, eo a vez kelennet er skokioù da skouer. Met unvan n’eo ket unan ha chomet eo bev ar rannyezhoù en tu-mañ hag en tu-all d’ar Pireneoù. Setu perak e kenderc’has an « Euskaltzaindia » (Akademiez an Euskareg) da studiañ anezhe. Un Atlas ar Rannyezhoù a vez embannet abaoe 2008 diwar parlantoù 145 kumun hag a vez studiet pizh gant teknikourien an Euskaltzaindia.
Nevez zo, gant an Akademiezh, zo bet lañset un dastumadeg levrioù gouestlet d’ar rannyezhoù e liamm gant an Atlas. « Berba-mintzoak » eo hec’h anv. E-barzh al levr kentañ zo bet studiet gerioù rannyezhel an amzer : deizioù ar sizhun, ar mizioù, ar sezonioù, … Gwechall-gozh da skouer ne oa nemet tri deiz er sizhun euskarad.
Mod-se e klask an Euskaltzaindia derc’hel bev ar rannyezhoù evit ma c’hellfe Euskariz implijout gerioù rannyezhel hep ma vefe torret an euskara batua.
Crédit photos : Euskaltzaindia
[cc] Breizh-info.com, 2025, dépêches libres de copie et diffusion sous réserve de mention de la source d’origine
