Scola Corsa : sinet an emglev !

Goude nav eurvezh o varc’hatañ, setu sinet an emglev diriaou 25 a viz even etre ar Strollegezh Korsika hag ar stad gall diwar-benn Scola Corsa, ar rouedad a skolioù e korseg dre soubidigezh. Ha betek ar momed diwezhañ e oa an emsaverien korsad war korf Paris gant manifestadegoù dirak ar prefetioù, ur rektordi ac’hubet ha pneuioù entanet mod Korsika.

6 post a vo kevratelet gant an Deskadurezh Stad diwar an 11 a oa reklemet gant ar strollegezh hag he frezidant Gilles Simeoni.

Kerkent hag an distro-skol 26-27 e vo « suret mont en-dro ar skolioù » dreist-holl evit a sell ouzh an arc’hant. Ar Strollegezh Korsika a c’hello kenderc’hel da arc’hantaouiñ ar rouedad, ar pezh ne oa ket anat e penn kentañ.

Hervez Sylvain Giannecchini, unan eus mouezhioù Scola Corsa, « e vo kemeret divizoù a-bouez a-benn ar sizhun a zeu ».

Ar pezh a c’heller kompren aze ez eo bet dizavouet Eric Jalon, prefed Korsika hag en doa sezizaet al lez-varn melestradurel evit sevel a-enep ur skoaziadenn roet gant ar Strollegezh da Scola Corsa. Setu penaos e krogas ar jeu.

E berr komzoù : evel e Breizh gant Diwan ez eus bet kavet e Korsika ur manier emglev evit leuskel Scola Corsa en ur seurt « dispisted lezennel » pe « fraost lezennel » hag a dorr mellad 2 ar Vonreizh hep mont re bell ganti. N’eo ket e-maez al lezenn met n’eo ket reizh-reizh kennebeut.

Ha pegoulz e vo aboliset ar mellad milliget ?

[cc] Article rédigé par la rédaction de breizh-info.com et relu et corrigé (orthographe, syntaxe) par une intelligence artificielle.

Breizh-info.com, 2026, dépêches libres de copie et de diffusion sous réserve de mention obligatoire et de lien do follow vers la source d’origine.