Goude deiziadoù ha nozvezhioù a feulster en enezenn emañ Gerald Darmanin, ministr gall an diabarzh, o paouez embann e vo roet ur statud nevez a emrenerezh da Gorsika, m’eo addilennet Emmanuel Macron evel just.
War ar rouedadoù sokial, setu pennoù bras ha pennoù bihan an Emsav Breizh o klemmichat : « ha perak ne vo ket roet ar memes tra da Vreizh ? » « Poent eo d’ober manifestadegoù evel e Korsika ! » hag all, hag all. Fidamdoue ! Manifestadegoù gant piv ? Gant ar c’hant istrogell bennak az a d’ober an Emsav Breizh bremañ ? N’omp ket gouest ken d’ober ur vanifestadeg unvan e Naoned evit al Liger-Atlantel e Breizh ha darn o deus c’hoant defial ar stad gall ? Evit gwir ? Hiviziken ez eus ur vanifestadeg « antifa » hag ur vanifestadeg « neptu » bep eil pe tri bloaz e Naoned rak ne fell ket d’an antifaioù dibunañ e straedoù Naoned asambles gant « faskourien » (da lavaret eo an neb n’eo ket ruz e vlev). Nag evit-se e vefe ar vretoned e-tailh da lakaat miliadoù a emsaverien er straedoù oc’h atahinañ ar polis noz ha deiz ? Te ‘gomz ! Dibabet eo bet gant an Emsav dispenn roudoù ar c’haochism « strolladigigigigel » (groupusculaire) etrebroadel, war-se an holl dud « normal » o deus kuitaet an Emsav. Ne vez ket mui den ebet d’ar pardon !
Ar re yaouank an hini eo a zo e penn ar manifestadegoù e Korsika. Hag e Breizh ? An darn vrasañ eus ar re yaouank a ra foeltr-forzh eus Breizh, nemet pa vez anv a fichañ ur Gwenn-ha-du en ur festival bennak, hag ar re a gemer perzh c’hoazh en Emsav broadel a vez kentoc’h troet war ar « jener » pe an « enep-faskouriezh » anez komz eus an « studiadennoù queer ». Da lavaret eo, forzh petra, ragachadegoù didalvout eus Hall B Roazhon 2. Lazhet ha peurlazhet eo bet an Emsav n’eo ket gant an tu-kleiz met gant ar gaochism. E Korsika n’eo ket « nann-biner » a zo o chetal mein war ar fliked, gwir baotred ha merc’hed eus an Emsav Broadel ne lavaran ket !
Ur wech c’hoazh e vo roet muioc’h a c’halloudoù da Gorsika ha, ganeomp-ni Breizhiz, e vo dañset ar jabadao !
JB
Précision : les points de vue exposés n’engagent que l’auteur de ce texte et nullement notre rédaction. Média alternatif, Breizh-info.com est avant tout attaché à la liberté d’expression. Ce qui implique tout naturellement que des opinions diverses, voire opposées, puissent y trouver leur place.
[cc] Breizh-info.com, 2022, dépêches libres de copie et de diffusion sous réserve de mention et de lien vers la source d’origine
0 réponse à “Emrenerezh evit Korsika, bruzunachoù evit Breizh [an Agora e brezhoneg]”
Gwir Bater eo. Petra ‘vo graet avat ?