Dirak ar barner eo sikouret gant ur jubennour arabeg-galleg. D’an 09 a viz kerzu e erruas ur breur hag ur c’hoar dirak ur savadur eus Mouster-al-Loc’h, nepell eus Sant-Nazer. Ya met un trede den a oa e-barzh ranndi ar vaouez : he mignon kozh. Ne ouare ket ar vaouez e oa er ranndi ha justawalc’h, fellout a rae dezhi e vefe roet hec’h alc’hwezioù en-dro gantañ.
Ar breur eo az eas da c’houlenn gantañ an alc’hwezioù ha setu loc’het ar jeu. Kemer a reas ar mignon ur gountell e-barzh bouest manegoù e garr-tan ha dao, reiñ a reas taolioù kountell d’ar breur ! Klask a reas en em wareziñ met gloazet eo bet e zaouarn hag e zivrec’h. Ur stirenn dezhañ e vo troc’het. Dindan boeson e oa met d’an nebeutañ e klaskas saveteiñ e c’hoar rak feuls eo a-wechoù ar mignon outi.
Ya met dirak ar barner ne savo ket a-du ar c’hoar gant he breur, gant e vignon kozh ne lavaran ket ! Hervezi en defe he breur lavaret “kunujennoù gouennelour” d’he gwaz ! Ha se zo pec’hed bremañ. Pec’hed lous ! Viloc’h eget pep tra !
O klevet e c’hoar e krog ar breur da leñvañ dirak ar barner. Hervezañ e vefe e c’hoar “dindan he hini kozh”. Ne fell ket dezhañ komz d’e c’hoar ken. Ar santimant da vezañ traiset ganti.
Ha padal e miz kerzu 2022 e voe skoet ar plac’h gant he mignon dija. Ha skeiñ a reas put ! Taolioù er penn, er c’hof. Met ne vern. Piket eo he c’halon gantañ ! Priñs ar mil nozvezh hag unan ! Met jalouz eo eñ un tamm rak, hervez an amezeien pa “tistro d’e vro ez a ar vaouez da zañsal en toulloù-noz !” Setu perak he dez fest ar vazh gwechoù zo.
A-benn ar fin eo bet kondaonet ar “priñs” da zaou vloavezh toull-bac’h, 6 anezho gant goursez. N’eo ket gall met gallout a ra chom e Bro-Frañs memestra rak ur bugel en deus gant e zouzig. Asambles int en-dro !
Pet’a ri…
[cc] Breizh-info.com, 2021, dépêches libres de copie et de diffusion sous réserve de mention et de lien vers la source d’origine
