2500 sin a oa bet rastellaet e Sant-Nazer gant emsaverien evit Breizh adunvanet a-drugarez d’ar Gwir war Intrudu ar Geodedourien lakaet da dalvezout er gumun-mañ. Reklem a rae an emsaverien e vefe isaet ar Gwenn-ha-Du ouzh an ti-kêr.
D’ar 16 a viz kerzu e rankas ar c’huzul-kêr lakaat ar gaoz war-se. Siwazh eo bet nac’het hor banniel broadel gant ar muianiver. Perak ? Peogwir int jakobined ! Padal eo bet arguzennet gant Sarah Trichet-Allaire (EELV) e oa ar Gwenn-ha-du ouzh ar savadur betek 1984. Eviti e oa un afer a « labour memorel » hag a « zedennusted touristel » ha netra all ! Yen e chomas dilennidi skipailh David Samzun (PS) ouzh arguzennoù « skañv » an hini Glas. Hag aze e komprener emañ c’hoazh tasmant Joël Batteux o satanaziñ an ti-kêr. Hervez ar guzulierez Maribel Letang-Martin (muianiver) eo ar Gwenn-ha-du « un arouez eus an Dukelezh enebour d’ar Republik » ! Ne oar ket eo bet torret Dukelezh Breizh e 1532 hag embannet ar Republik e 1792, da lavaret eo 260 bloaz war-lerc’h marteze ?
Nac’het eo bet ar plakennoù straed e brezhoneg ivez.
Ha padal e oa bet sinet live 1 eus karta ar brezhoneg gant an ti-kêr e 2019, lañset ur c’hlas divyezhek en ur skol bublik ha staliet panelloù « Sant-Nazer ». Met isañ ar Gwenn-ha-du a oa re evit tasmant Joël Batteux a zo atav o rodal e pennoù ar guzulierien PS moarvat.
[cc] Breizh-info.com, 2022, dépêches libres de copie et de diffusion sous réserve de mention et de lien vers la source d’origine
